ဖေဖော်ဝါရီ ၂၃ ၊ ၂၀၂၆
GG (VOM)
စစ်ကိုင်းတိုင်း၊ ဟုမ္မလင်းမြို့နယ်မှာ ဖေဖော်ဝါရီ ၂၂ ရက်နေ့ ညနေပိုင်းက လေကြောင်းတိုက်ခိုက်ခံရပြီး လူခုနှစ်ယောက် သေဆုံးကာ ငါးယောက်ထိခိုက်ဒဏ်ရာ ရရှိခဲ့တယ်လို့ စုံစမ်းသိရှိရပါတယ် ။
ညနေ ၃ နာရီခွဲလောက်မှာ ပဲနုပ်ဆွပ်ကျေးရွာကို Gyrocopter နဲ့ ဗုံးကြဲခံခဲ့ရတာ ဖြစ်ကြောင်း ၊ သေဆုံးသူတွေထဲမှာ အမျိုးသမီးတွေလည်း ပါဝင်တယ်လို့ သိရပါတယ်။
” လောလောဆယ်သိရတာ သေဆုံးခုနှစ်ယောက်ရှိတယ် ။ ဒဏ်ရာရသူတွေထဲမှာလည်း အခြေအနေ စိုးရိမ်ရသူတွေ ရှိတယ်ဆိုတာပဲ သိရသေး တယ်။ ကျန်တဲ့အခြေအနေတော့ မသိရသေးဘူး ။ ” လို့ စစ်ရေးသတင်းရင်းမြစ်က ပြောပါတယ်။
လက်ရှိမှာ ထိခိုက်ဒဏ်ရာရရှိသူတွေကို ဆေးကုသမှူပေးနေပြီး ဒဏ်ရာပြင်းထန်သူတွေလည်းရှိတယ်လို့ သိရပါတယ်။
ပဲနုပ်ဆွပ်ရွာကတော့ လက်ရှိမှာ ဒေသတွင်းလက်နက်ကိုင်အဖွဲ့တွေ စိုးမိုးထားတဲ့ နေရာဖြစ်တယ်လို့ သိရပါတယ်။
ပြီးခဲ့တဲ့ သီတင်းပတ် ဖေဖော်ဝါရီ ၁၅ ရက်က ယာယီသမ္မတ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ဟာ ဟုမ္မလင်းနဲ့ နာဂဒေသတွေကို သွားရောက်ခဲ့ပါသေးတယ်။
ဖေဖော်ဝါရီ ၂၂ရက်နေ့က ကျွန်းလှမြို့နယ် အနောက်ခြမ်းမှာရှိတဲ့ သဖန်းဆိပ်ဆည်အနီးမှာလည်း လေကြောင်းတိုက်ခိုက်မှုဖြစ်ပွားခဲ့တယ်လို့ သိရပါတယ်။
စစ်ကိုင်းတိုင်းထဲက ရေဦး ၊ ခင်ဦး ၊ တန့်ဆည် ၊ မြောင် ၊ ပုလဲ ၊ ရွှေဘို ၊ မုံရွာ စတဲ့ မြို့နယ်တချို့မှာ စစ်ရေးအခြေအနေ တင်းမာနေပြီး အစိုးရတပ်က စစ်ကြောင်းထိုး နယ်မြေရှင်းလင်းရေးလုပ်ဆောင်နေသလို လေကြောင်းပစ်ကူတိုက်ခိုက်မှုတွေပါ ရှိနေတယ်လို့ သိရပါတယ်။
ဓာတ်ပုံ – CJ
